मेरी हजुर आमाको युग

उहिले धेरै वर्ष पहिले
म र मेरी आमा नजन्मदै
मेरी हजुर आमा पैदलै घर-माइत गर्थिन्
उकाली ओह्राली हिँड्थिन्
मोटर गाडी त उनले कहाँ देख्नु!

मेरी आमालाई मोटर गाडी चल्ने मधेशमा अन्माइयो
डेढ दिनको बाटो हिँडेर मधेश आइपुगेपछि बल्ल गाडी चढ्न पाउँथिन्
अहिले मसँग गाडी त छ
तर पनि म पैदलै माइत जान्छु
इन्धनको अभावमा
कतै म हजूर आमाकै युगमा बाँचिरहेकी त छैनँ ?

भिजेका दाउरा बालेर पिएको धुँवाले मेरी हजुर आमालाई दम भयो
उनी त्यसैको पीरले यस लोकमा रमाउन सकिनन्
त्यही देखेर मेरी आमाले जतन गरिन्
भूसे चुल्हो फ्याँकेर एलपीजी ग्यास किनिन्
आज म एलपीजी ग्यासको रित्तो सिलिण्डर थन्काएर दाउरा खोज्न हिँडेकी छु
कतै म हजूर आमाकै युगमा बाँचिरहेकी त छैनँ ?

मेरी हजुर आमाले नाति जन्मियोस् भनी पशुपतिमा भाकल गरिन्
मेरी आमाले छोरो पाऊँ भनी पशुपतिमा लाख बत्ती बालिन्
आज मैले राष्ट्र कल्याणका लागि पशुपतिमा महापूजा गरेँ 
कतै म हजूर आमाकै युगमा बाँचिरहेकी त छैनँ ?

 भौतिक सुविधाले विकास चिनाउँछ रे
अन्धविश्वास हराएर जान्छ रे
अनि नयाँ युगको प्रारम्भ हुन्छ रे
 तर मलाई किन यस्तो लाग्छ
कतै म हजूर आमाकै युगमा बाँचिरहेकी त छैनँ ?