हे दैव कस्ता छौ ?

सृष्टिका मालिक तिमीले आमा कसरी बनायौ ?

आमाको माया, अनौठो काया कसरी जुरायौ ?

कसरी बन्यो त्यो स्नेह-पुञ्ज, आश्चर्य लाग्दछ

“आमा” यो शब्द मात्र नै पनि अपूर्व लाग्दछ ॥

आमालाई रच्ने, आमा सिर्जने, आमालाई बनाउने

छ भने यदि क्यै कुनै शक्ति आमालाई  चिनाउने ।

जो होस् त्यो दैव, देउता वा ईश, तिमीलाई धन्यवाद

आमा न हुँदा के हुन्थ्यो होला ! तिमीलाई साधुवाद  ॥

मायाकी खानी, दयाकी मूर्ति, स्नेहकी ती नदी

ममताको अर्थ, नराखी स्वार्थ बनेको त्यो छवि ।

शीतलु छाया, आमाको माया, नसुक्ने मुहान

सन्तानका लागि सर्वस्व दिने ती आमा महान ॥

मायाको रूप, प्रेमको अर्थ, त्यागको बखान

आमाले मात्र बुझाउन सक्छिन् ख्यालठट्टा नठान ।

गीताको कर्म, त्यागको मर्म सिकाउने लाख छन्

सबैको भन्दा उत्तम ज्ञान आमाको काख झन् ॥

संसार बनाउने, आमालाई रच्ने,  हे दैव कस्ता छौ ?

के तिमी पनि दयाकी मूर्ति यी आमा जस्ता छौ ?

ईश्वर तिमी आमालाई रच्ने, तिमीलाई नमस्कार ।

आमाको माया, यो बुझ्न पायाँ, अमूल्य पुरस्कार ॥