फेसबुक पुराण

आऔँ साथी सुनौँ आज फेसबुक पुराण लौ ।

अम्रिका देशमा जन्म्यो जुकरबर्ग पिता भयौ ।।

न्वारनको नाम दी फेस्बुक् दुइ वर्ष पुगेपछि ।

दौडियो हामफालेर कम्मरमा पटुका कसी ।।

सबैको प्रिय भो प्यारो सबैका घर बास भो ।

बूढा आमाबुवालाई छोराछोरी समान भो ।।

लमी पनि भयो कैले प्रेमी मन मिलाउने ।

कहिले मन्थरा जस्ती घरबार छुटाउने ।।

सूचना सबको राख्ने जन्मेदेखि मरेतक ।

लायो, खायो, गयो, आयो एक एक हिसाब छ ।।

सुत्केरो वा जुठो कैले उसैले सब जान्दछ ।

बिहावारी, दशैं चाड छेकबार लगाउँछ ।।

को राम्री को नराम्री हो, उसैले सब तोक्दछ ।

चियो-चर्चो गरौँ भन्दा पूजा-सामाँ सारा जुटाउँछ।।

ज्ञान विज्ञानको खानी जे खोजे पनि मिल्दछ ।

हाँसो र आँसुको वर्षा चित्त कैले दुखाउँछ ।।

कुन लुगाले सुहाएको कुनले रूप निखार्दछ ।

फोटो हाल्यो कि भन्दिन्छ मख्ख पार्न सिपालु छ ।।

बिहान बेलुका नित्य जो गर्छन् यसको जप ।

जुकर्बर्ग धनी पार्छन् शेयरको भाउ दोब्बर ।।

वरदान मिलीहाल्छ विलम्ब नगरीकन ।

फेसबुक मन्त्रको जाप गरौँ नित्य गुणीजन ।।

(अनुष्टुप छन्द)

photo: https://www.google.com/search?safe=strict&biw=1280&bih=721&tbm=isch&sa=1&ei=CsjOXLG2GYuua92UupAG&q=facebook+image&oq=facebook+image&gs_l=img.3..0i2l3j0i30l7.1411.3941..4636...0.0..0.94.530.6......1....1..gws-wiz-img.......35i39.ofh0eNiZ0Ow#imgrc=hbFHbIVUzP-KdM: